မြန်မာနိုင်ငံဆေးနှင့်ဆေးပစ္စည်းလုပ်ငန်းရှင်များအသင်း Myanmar Chamber of Commerce for Pharmaceutical & Medical Device (MCCPMD) (၂၁) ကြိမ်မြောက် နှစ်ပတ်လည် အသင်းသားစုံညီအစည်းအဝေး ကျင်းပပြုလုပ်ခြင်း။
မြန်မာနိုင်ငံဆေးနှင့်ဆေးပစ္စည်းလုပ်ငန်းရှင်များအသင်း၏ (၂၁)ကြိမ်မြောက် နှစ်ပတ်လည် အသင်းသားစုံညီ အစည်းအဝေးကို ၂၀၂၄ ခုနှစ်၊ ဒီဇင်ဘာလ (၆)ရက်၊သောကြာနေ့ ၊ နေ့လည် (၁:၀၀) နာရီ အချိန်တွင် UMFCCI Office Tower မင်္ဂလာခန်းမ၌ ကျင်းပခဲ့ပြီး အစည်းအဝေးသို့ အစားအသောက်နှင့် ဆေးဝါးကွပ်ကဲရေးဦးစီးဌာနမှ ညွှန်ကြားရေးမှူး(ရန်ကုန်) နှင့် တာဝန်ရှိပုဂ္ဂိုလ်များ၊မြန်မာနိုင်ငံ ဆရာဝန်အသင်း၊ မြန်မာနိုင်ငံဆေးကောင်စီ၊ မြန်မာနိုင်ငံဆေးပညာရှင်များအသင်း၊ မြန်မာနိုင်ငံ ကြက်ခြေနီအသင်းများမှ ဥက္ကဌများနှင့် တာဝန်ရှိပုဂ္ဂိုလ်များ၊ ပြည်ထောင်စုသမ္မတမြန်မာနိုင်ငံ ကုန်သည်များနှင့်စက်မှုလက်မှုလုပ်ငန်းရှင်များအသင်းချုပ် (UMFCCI) မှ ဥက္ကဌနှင့် တာဝန်ရှိသူများ၊ မြန်မာနိုင်ငံဆေးဝါးနှင့ဆေးပစ္စည်းထုတ်လုပ်သူများအသင်း ဥက္ကဌနှင့် တာဝန်ရှိ ပုဂ္ဂိုလ်များ၊ ညီနောင်အသင်းများမှ ဥက္ကဌများနှင့် တာဝန်ရှိပုဂ္ဂိုလ်များ၊ မြန်မာနိုင်ငံဆေးနှင့်ဆေးပစ္စည်း လုပ်ငန်းရှင်များအသင်း၏ အကြံပေးပုဂ္ဂိုလ်များ၊ ဗဟိုအလုပ်အမှုဆောင်နှင့် အလုပ်အမှုဆောင်များ၊ အသင်းဝင်ကုမ္ပဏီများနှင့် အသင်းသားများ စုစုပေါင်း(၂၀၀) ဦးခန့် တက်ရောက်ခဲ့ကြပါသည်။
အခမ်းအနားတွင် ပြည်ထောင်စုသမ္မတမြန်မာနိုင်ငံ ကုန်သည်များနှင့်စက်မှုလက်မှု လုပ်ငန်းရှင်များအသင်းချုပ် (UMFCCI) ဥက္ကဌမှ အမှာစကား ပြောကြားပြီး၊ မြန်မာနိုင်ငံဆေးနှင့်ဆေးပစ္စည်းလုပ်ငန်းရှင်များအသင်း ဥက္ကဌဒေါက်တာဝင်းကြိုင်မှ ကြိုဆိုနူတ်ခွန်းဆက်စကားနှင့် အသင်း၏ တစ်နှစ်တာကာလအတွင်း လုပ်ဆောင်ချက်များကို ရှင်းလင်းတင်ပြခဲ့ပါသည်။
ထို့နောက် မြန်မာနိုင်ငံဆေးနှင့်ဆေးပစ္စည်းလုပ်ငန်းရှင်များအသင်း အထွေထွေအတွင်းရေးမှူး ဦးကျော်ဦးမော်မှ အလုပ်အမှုဆောင်အဖွဲ့၏ နှစ်ပတ်လည် အစီရင်ခံစာနှင့် ၂၀၂၃-၂၀၂၄ ခုနှစ်အတွက် နှစ်ချုပ်ငွေစာရင်းရှင်းတမ်းကို ဖတ်ကြားတင်ပြခဲ့ပြီး အစည်းအဝေး တက်ရောက်လာကြသော အသင်းဝင်များထံမှ ကန့်ကွက်ရန် ရှိ/ မရှိကို (၃)ကြိမ် မေးမြန်းခဲ့ပါသည်။ အစည်းအဝေးသို့ တက်ရောက်လာကြသော အသင်းဝင်များမှ ကန့်ကွက်ရန် မရှိကြောင်း တစ်ပြိုင်တည်း ပြန်လည်ဖြေကြားခဲ့ကြသည့်အတွက် (၂၁)ကြိမ်မြောက်နှစ်ပတ်လည် အသင်းသားစုံညီအစည်းအဝေး သို့ တင်သွင်းသည့် ၂၀၂၃-၂၀၂၄ ခုနှစ်အတွက် ငွေစာရင်းရှင်းတမ်းကို အတည်ပြုပါကြောင်း ကြေညာပေးခဲ့ပါသည်။
ဆက်လက်၍ အသင်းဝင်များထံမှ ကြိုတင်ပေးပို့ထားသော မေးမြန်းချက်၊ အကြံပြုချက်များ မရှိသည့်အတွက် အစည်းအဝေးအစီအစဉ်ကို ဆက်လက်ကျင်းပခဲ့ပြီး အသင်းမှဦးဆောင်ပြုလုပ်သော ကဏ္ဍရပ်များ၌ ပူးပေါင်းပါဝင် ပံ့ပိုးကူညီခဲ့ကြသော အသင်းဝင်ကုမ္ပဏီများနှင့်အလှူရှင်များအား ဂုဏ်ပြုလွှာကဒ်များပြန်လည်ပေးအပ်ခဲ့ကြပါသည်။ ထို့နောက် မြန်မာနိုင်ငံဆေးနှင့်ဆေးပစ္စည်း လုပ်ငန်းရှင်များအသင်း ဥက္ကဌ ဒေါက်တာဝင်းကြိုင်မှ နိဂုံးချုပ် အမှာစကားပြောကြားကာ နှစ်ပတ်လည်အစည်းအဝေးကို နေ့လည် (၂:၀၀)နာရီ အချိန်တွင် အောင်မြင်စွာ ကျင်းပပြီးစီးခဲ့ပါသည်။
